Trailer på hydrogen

Det amerikanske selskapet Nikola Motor Company viste nyleg modellen One for første gong, ei trekkvogn som går på hydrogen.

Selskapet seier i ei pressemelding at køyretøyet skal ha ytingar som svarar til meir enn 1000 hestekrefter og 2.710 newtonmeter i dreiemoment, meir enn det dobbelte av kva ein finn i dagens semitrailerar.

Nikola One skal ha ei rekkevidde på 130 til 190 mil mellom kvar hydrogenfylling, som er oppgitt til å ta 15 minutt. Utsleppet frå ein motor som går på hydrogen er vassdamp, og rekkevidda seiast å vere langt betre enn hos tilsvarande køyretøy som går på diesel.

Dei skal så langt ha fått førehandsordrar verdt 25 milliardar kroner.

Når køyretøyet faktisk vert sett i produksjon, er førebels uklart, sidan fabrikken ikkje er bygd.

– Nikola skal byggje ein avansert fabrikk i verdsklasse, som vil skape tusenvis av nye jobbar, sa grunnleggjar og konsernsjef Trevor Milton.